පසුගිය (13) වනදා තලංගම, අකුරේගොඩදී නීතිඥයෙකු සහ ඔහුගේ බිරිඳ වෙඩි තබා ඝාතනය කිරීමේ සිද්ධියේ වෙඩික්කරුවෙකු සහ ඔවුන්ට ප්රවාහන පහසුකම් සැපයූ බව කියන පුද්ගලයෙකු හඳුනාගෙන ඇතැයි මහජන ආරක්ෂක අමාත්ය ආනන්ද විජේපාල මහතා පැවසීය.
අදාළ ඝාතන සිද්ධිය සම්බන්ධයෙන් අද (20) පාර්ලිමේන්තුවේදී අදහස් දක්වමින් අමාත්යවරයා පැවසුවේ එම සැකකරුවන් අත්අඩංගුවට ගැනීම සඳහා අවශ්ය පියවර ගනිමින් සිටින බවය.
එහිදී වැඩිදුරටත් අදහස් දැක්වූ අමාත්ය ආනන්ද විජේපාල මහතා පැවසූවේ, වෙඩික්කරුවන් අපරාධය සිදු කිරීමට ප්රථම නවාතැන්පොළ වෙත කැඳවා ගෙන පැමිණි රථය අත්අඩංගුවට ගැනීමට විමර්ශන කටයුතු ආරම්භ කර ඇති බවත් එහි හිමිකරු, රසික නිවස, පරණ කොළණිය ඇත්කඳුර, ගාල්ල නිවසේ පදිංචි “වන්නිආරච්චිගේ සිහින දිල්සර” යන අය මේ වන විට හඳුනාගෙන ඇති බවත්ය.
තවද මෙම අපරාධය සිදු කිරීම සඳහා රිවෝල්වර් වර්ගයේ ගිනි අවියකින් වෙඩි තැබූ සැකකරු, අංක 102/9, පන්සල පාර, රුක්ගහවෙල පදිංචි “රූබට් සුරේෂ්” බවට මේ වන විට හඳුනාගෙන ඇති බවත් ඔහු අත්අඩංගුවට ගැනීමට මේ වන විට පුළුල් විමර්ශන ආරම්භ කර ඇති බවත් එම මහතා ප්රකාශ කරන ලදි.
මෙතෙක් සිදුකර ඇති විමර්ශනයේදී මෙම අපරාධය විදේශගතව සිටින සංවිධානාත්මක අපරාධකරුවෙකු සහ මත්ද්රව්ය ජාවාරම්කරුවෙකු වන ”ටුටූ” නම් අන්වර්ථ නාමයෙන් හඳුන්වන “උග්ගල්ල ආරච්චිගේ තරිඳු මදුශංක” නැමැති අය විසින් මෙහෙයවා ඇති බවට තොරතුරු අනාවරණය කරගෙන ඇත. පොලිස් කණ්ඩායම් මේ වනවිට මේ සම්බන්ධව පුළුල් විමර්ශන දියත් කර තිබේ.
