පසුගිය (13) වනදා තලංගම අකුරේගොඩදී නීතිඥවරයෙකු සහ ඔහුගේ බිරිඳ ඝාතනයට යොදාගත් ගිනිඅවි ප්රවාහනය කළ සහ වෙඩික්කරුවන්ට පහසුකම් සැලසූ නවගමුවේ පදිංචි එකම පවුලේ සහෝදරයින් දෙදෙනෙකුව ඊයේ (16) පොලීසිය විසින් අත්අඩංගුවට ගනු ලැබීය.
පොලීසිය පවසන්නේ, නීතිඥවරයාගේ වාහනය ඇති ස්ථානය සම්බන්ධයෙන් ඔත්තු ලබාදී ඇත්තේද මෙම සහෝදරයින් දෙදෙනා බවය.
නවගමුවවේ පදිංචිකරුවන් වන නදුන් කවීෂ සහ සනෝජ් කෝකිල යන ඔවුන් දෙදෙනා වයස අවුරුදු 20 සහ 24 වයස්වල පසුවන මෙම සැකකරුවන් ඊයේ පස්වරුවේදී කොට්ටාව ප්රදේශයේ මෝටර් රථයකින් ගමන් කරමින් සිටියදී බස්නාහිර දකුණ අපරාධ කොට්ඨාසයේ නිලධාරීන් පිරිසක් විසින් අත්අඩංගුවට ගෙන ඇත.
එම දෙදෙනාගෙන් සිදුකළ ප්රශ්න කිරීම්වලදී නීතිඥවරයාගේ ඝාතනය සම්බන්ධයෙන් වැදගත් තොරතුරු රැසක් අනාවරණ වී තිබේ.
විදෙස්ගතව සිටින අපරාධකරුවන් වන තරිඳු මධුසංඛ නොහොත් ”ටුටූ” සහ ”මෝදර නිපුන” යන අයගේ මෙරට තුළ අයිස් ජාවාරම මෙහෙයවනු ලබන්නේ මෙම සහෝදරයින් දෙදෙනා වන අතර එම අපරාධකරුවන් දෙදෙනා මෙම සහෝදරයින් අමතා “දවස් 7කට වාහනයක් රෙන්ට් එකට ගනින් , සුද්දා අයියාගේ වැඩක් තියෙනවා, ඒක කරන්න ඕනේ“ යැයි පවසා ඇත.
ඒ අනුව සහෝදරයින් දෙදෙනා කොට්ටාවේ ආයතනයක් වෙත ගොස් කුලී පදනම මත කළු පැහැති මෝටර් රථයක් ලබාගෙන ඇති අතර පසුව තවත් පුද්ගලයෙක්, සහෝදරයින් අමතා පවසා ඇත්තේ කොටිකාවත්තේ යම් ස්ථානයකට ගොස් එහි පැමිණෙන ත්රීරෝද රථයකින් ලබාදෙන ගිනිඅවි සහිත පාර්සලයක් ලබාගන්නා ලෙසටය.
එය රැගෙන නීතිඥවරයා ඝාතනයට ලක්වූ සුපිරි වෙළෙඳසැල අසලට යන්නැයි එම පුද්ගලයා , සහෝදරයින් දෙදෙනාට පවසා තිබේ.
පසුව ඔවුන් වෙඩි තැබීම සිදුවූ දිනයේ, සිද්ධියට පැය කිහිපයකට පෙර අකුරේගොඩ ප්රදේශයේ පිහිටි සුපිරි වෙළෙඳසැල ආසන්නයට ගොස් ඒ ආසන්නයේ නවතා තිබූ තවත් මෝටර් රථයකට ගිනිඅවි සහිත පාර්සලය භාරදී ඇත.
මෙම ගිනිඅවි භාවිත කරමින් අදාළ නීතිඥවරයා ඝාතනය කිරීමට නියමිත බව මෙම සහෝදරයින් දෙදෙනා සතියක පමණ කාලයක සිට දැනුවත්ව සිට ඇතැයි පොලීසිය අනාවරණ කරගෙන තිබේ.
සහෝදරයින් දෙදෙනා, ඝාතනයට ලක්වූ නීතිඥවරයාගේ රථය සම්බන්ධයෙන් ඔත්තු බලා ඇති අතර නීතිඥවරයා සිය බිරිඳ ඇයගේ කාර්යාලයෙන් නංවා ගෙන සෑම දිනකම පිටත්ව යන්නේ පස්වරු 4.30ත් – 5ත් අතර වේලාවේදී බවත් වෙඩිතැබීම සිදුවූ දින එය සුපිරි වෙළෙඳසැලේ රථගාලේ නවතා ඇති බවත් වෙඩික්කරුවන්ට ඔත්තුව දී ඇත්තේද ඔවුන් දෙදෙනාය.
අනතුරුව වෙඩික්කරුවන් රැගත් මෝටර් රථය එහි පැමිණ නීතිඥවරයා සහ බිරිඳ ඝාතනය කරන අතරවාරයේ සහෝදරයින් දෙදෙනා ඉන් පිටත්ව හෝකන්දර දෙසට ගමන් කර තිබේ.
ඝාතනයට අදාළ CCTV දර්ශන සහ තවත් කරුණු රැසක් ඔස්සේ විමර්ශන සිදුකළ බස්නාහිර දකුණ අපරාධ කොට්ඨාසය වෙඩික්කරුවන්ට ගිනිඅවි ලබාදී ඇත්තේ මෙම මෝටර් රථයෙන් බව අනාවරණ කරගැනීමෙන් පස දින 7ක් සඳහා කුලී පදනම මත ලබාගත් මෝටර් රථය යළි භාරදීම සඳහා මෙම සහෝදරයින් දෙදෙනා අද පස්වරුවේ කොට්ටාවේ ආයතනය වෙත යමින් සිටින අතරතුර ඔවුන් ලුහුබැඳ ආ පොලිස් නිලධාරීන් මෝටර් රථය සිය භාරයට ගෙන සහෝදරයින් දෙදෙනා අත්අඩංගුවට ගන්නා ලදි.
සැකකරුවන් දෙදෙනාගෙන් සිදුකළ ප්රශ්න කිරීම්වලදී වෙඩික්කරුවන් සම්බන්ධයෙන්ද තොරතුරු අනාවරණ වී තිබේ.
වෙඩි තැබීමට ආ වෙඩික්කරුවන් අතරින් එක් අයෙක් වෙඩිතැබීමට දින 3කට පෙර පන්නිපිටියේ හෝටලයකට පැමිණ ඇති බවත් පසුව එහි පැමිණි තිබූ සහෝදරයින් දෙදෙනා වෙඩික්කරුට අයිස් සහ අවශ්ය පහසුකම් සපයා ඇති බවත් අනාවරණය වී ඇත.
අනෙක් වෙඩික්කරු එම හෝටලයට පැමිණ ඇත්තේ වෙඩි තැබීම සිදුවූ දින බවද පොලීසිය අනාවරණ කරගෙන ඇත.
ඒ අනුව මෙම ඝාතනය සඳහා පහසුකම් සැලසීම වෙනුවෙන් සහෝදරයින්ට මුදල් ලැබී නොමැති අතර ඔවුන්ට අයිස් මත්ද්රව්ය ලබාදී තිබේ.
පොලීසිය පැවසුවේ අයිස් මත්ද්රව්ය භාවිත කරන සැකකාර සහෝදරයින් දෙදෙනා අයිස් ජාවාරම සිදුකර ඇති බවය.
මේ සම්බන්ධයෙන් වැඩිදුර විමර්ශන පොලිස්පති ප්රියන්ත වීරසූරිය මහතාගේ සෘජු අධීක්ෂණයෙන්, බස්නාහිර පළාත භාර ජ්යෙෂ්ඨ නියෝජ්ය පොලිස්පති සජීව මැදවත්ත මහතාගේ මෙහෙයවීමෙන්, බස්නාහිර දකුණ දිසාව භාර නියෝජ්ය පොලිස්පති සාමන්ත විජේසේකර මඟපෙන්වීමෙන් බස්නාහිර දකුණ අපරාධ කොට්ඨාසය විසින් සිදුකරනු ලැබේ.
