ඉන්දියාවේදී අත්අඩංගුවටගත් මිනී මැරුම්, කප්පම් ගැනීම්, අවි ජාවාරම් සම්බන්ධයෙන් පොලිසියට අවශ්ය කර සිටි දරුණු ගණයේ අපරාධකරුවකු වන සෝබනහන්දි සනත් ද සිල්වා හෙවත් ‘SF රාජු’ ඊයේ (18) රාත්රියේ දිවයිනට රැගෙන ඒමෙන් අනතුරුව මේ වනවිට පොලිස් මධ්යම අපරාධ විමර්ශන කාර්යාංශයේ රඳවාගෙන ප්රශ්න කරමින් තිබේ.
ඒ, පැය 72ක කාලයකට ලබාගත් රැඳවුම් නියෝග මතය.
සෝබනහන්දි ජයලත් ද සිල්වා හෙවත් ‘කරන්දෙණියේ සුද්දා’ගේ සහෝදරයා වන සෝබනහන්දි සනත් ද සිල්වා හෙවත් ‘SF රාජු’ ඉන්දියාවේ නවදිල්ලි ගුවන්තොටුපොළේදී පසුගියදා අත්අඩංගුවට ගනු ලැබීය.
ඒ පොලිස් මධ්යම අපරාධ විමර්ශන කාර්යාංශයේ පොලිස් පරීක්ෂකවරයෙකුට ලද තොරතුරකට අනුව ශ්රී ලංකා පොලිසිය ඉන්දිය බුද්ධි අංශ වෙත ලබාදුන් තොරතුරකට අනුවය.
‘SF රාජු’ ඉන්දියාවට පැමිණ ග්රිසියට හෝ ඉතාලියට පලායාමට සූදානමින් සිට ඇති බව එම තොරතුරේ සඳහන්ව තිබී ඇත.
ඒ අනුව ‘SF රාජු’ කටුනායක ගුවන්තොටුපොළින් ඊයේ රාත්රියේ මෙරටට රැගෙන එනු ලැබීය.
සැකකරු වැඩිදුර විමර්ශන සඳහා පොලිස් මධ්යම අපරාධ විමර්ශන කාර්යාංශය භාරදීමෙන් අනතුරුව එහි අධ්යක්ෂ ජ්යෙෂ්ඨ පොලිස් අධිකාරී කමල් ආරියවංශ මහතා ඇතුළු නිලධාරීන් කණ්ඩායමක් විසින් ඊයේ රාත්රියේම ඔහු රැගෙන එනු ලැබීය.
පොලිස් මධ්යම අපරාධ විමර්ශන කාර්යාංශය භාර ජ්යෙෂ්ඨ නියෝජ්ය පොලිස්පති රන්මල් කොඩිතුවක්කු මහතාගේ සෘජු අධීක්ෂණයෙන්, නියෝජ්ය පොලිස්පති චන්දන කොඩිතුවක්කු මහතාගේ මෙහෙයවීමෙන් සැකකරු පිළිබඳ වැඩිදුර විමර්ශන සිදුකරමින් පවතියි.
‘SF රාජු’ පොලිස් විශේෂ කාර්ය බලකායේ සිට පසුව යුද හමුදා විශේෂ බලකායේ සෙබළෙකු ලෙස කටයුතු කර තිබේ.
තම සොහොයුරා වන කරන්දෙණියේ සුද්දා සමග එක්ව හිත හොඳ දොස්තර ඝාතනය කිරීමත් සමග මොහු පාතාලයට අත්පොත් තබා ඇති අතර කරන්දෙණියේ සුද්දා ලබා ගන්නා කොන්ත්රාත් ඝාතන බහුතරයක් මොහු මෙහෙයවා ඇති බවද වාර්තාවේ.
එමෙන්ම මිනී මැරුම්, කප්පම් ගැනීම්, අවි ආයුධ ජාවාරම් කිරීම් හා පාතාල ක්රියාදාම මෙහෙයවීම සම්බන්ධයෙන් ද මොහුට චෝදනා එල්ලවී තිබේ.
අකුරේගොඩදී පසුගියදා නීතීඥවරයෙකු සහ ඔහුගේ බිරිඳ ඝාතනය කිරීම මෙහෙයවා ඇත්තේද ‘SF රාජු’ බවට සැක කෙරේ.
කරන්දෙණියේ සුද්දාගේ කල්ලිය දකුණු පළාතේ මේ වන විට ක්රියාත්මක දරුණුතම අපරාධ කල්ලියක් වන අතර මොහු අත්අඩංගුවට පත්වීමත් සමග දකුණේ අපරාධ රැසක් පාලනය කරගැනීමට හැකිවනු ඇති බවට පොලිසිය අපේක්ෂා කරයි.
