ශ්‍රී ලංකා ආයුර්වේද ඖෂධ සංස්ථාවේ පරිගණක පද්ධතියේ දත්ත වෙනස් කරමින් චෙක්පත් මගින් රු.27,031,024.15ක මුදලක් වංචා කළ බවට පරණ කොට්ටාව පාර, නාවින්න, මහරගම ලිපිනයේ පිහිටි ශ්‍රී ලංකා ආයුර්වේද ඖෂධ සංස්ථාවේ සාමාන්‍යාධිකාරිවරයා විසින් පසුගිය මාර්තු 20 වන දින අපරාධ පරික්ෂණ දෙපාර්තමේන්තුව වෙත සිදුකරන ලද පැමිණිල්ලකට අදාලව සිදුකල විමර්ශනයට අනුව එම වංචාවට සම්බන්ධ පුද්ගලයකු සහ ඊට ආධාර අනුබල දුන් කාන්තාවන් දෙදෙනෙකු අපරාධ පරික්ෂණ දෙපාර්තමේන්තුව විසින් පසුගිය 01 දා අත්අඩංගුවට ගෙන ඇත.
කැලණිය ප්‍රදේශවල පදිංචිකරුවන් වන 35 වන වියේ පසුවන සැකකරුවකු සහ 25 සහ 32 වයස් වල පසුවන සැකකාරියන් දෙදෙනෙකු මෙලෙස අත්අඩංගුවට ගෙන ඇත.
සැකකරුවන් ඊයේ (02) දින නුගේගොඩ ගරු මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුව මේ මස 11 වන දින දක්වා රක්ෂිත බන්ධනාගාර ගත කර ඇත.
සැකකරුවන් සම්බන්ධයෙන් වැඩිදුර විමර්ශන අපරාධ පරික්ෂණ දෙපාර්තමේන්තුව විසින් සිදුකරනු ලබන බව බව පොලිස් මාධ්‍ය කොට්ඨාශය ප්‍රකාශ කරන ලදි.
