අයිස් මත්ද්‍රව්‍ය ග්‍රෑම් 12 මිලිග්‍රෑම් 600ක් සන්තකයේ තබාගෙන සිටි පුද්ගලයකු, බොරැල්ල පොලිස් ස්ථානයේ නිලධාරීන් පිරිසක් විසින් ඊයේ (03) දින අත්අඩංගුවට ගෙන ඇත.
බොරැල්ල ප්‍රදේශයේ පදිංචිකරුවකු වන 44 වන වියේ පසුවන සැකකරු බොරැල්ල සීවලී පටුමග ප්‍රදේශයේදී අත්අඩංගුවට ගෙන ඇත.
පසුව මෙම සැකකරුගේ නිවස පරික්ෂා කිරීමේදී ව්‍යාජ අංක තහඩු, ව්‍යාජ ආදායම් බලපත්‍ර හා ව්‍යාජ රක්ෂණ සහතික සහිත, චැසි අංක සහ එන්ජින් අංක මකා දමා ඇති යතුරුපැදියක් සොයාගෙන ඇත.
මෙම සැකකරු මනුෂ්‍ය ඝාතන කිහිපයකටම සම්බන්ධ පුද්ගලයකු බවත්, දැනට විදේශගතව සිටිමින් මත්ද්‍රව්‍ය ජාලයක් මෙහෙයවන සංවිධානාත්මක අපරාධ කල්ලි සාමාජිකයෙකුගේ ගෝලයෙකු බවත් වැඩිදුර විමර්ශන වලදී පොලීසිය විසින් අනාවරණය කරගෙන ඇත.
බොරැල්ල පොලිස් ස්ථානයේ නිලධාරීන් වෙත ලද තොරතුරක් මත සිදුකළ වැටලීමකදී සැකකරු අත්අඩංගුවට ගෙන ඇත.
සැකකරු සම්බන්ධයෙන් වැඩිදුර විමර්ශන බොරැල්ල පොලීසිය විසින් සිදුකරනු ලබන බව පොලිස් මාධ්‍ය කොට්ඨාශය ප්‍රකාශ කරන ලදි.
