ඊයේ (01) දින වත්තල හේකිත්ත පාර ප්‍රදේශයේ ලැගුම්හලක කාමරයක් තුළ කාන්තාවක් ගෙල වැළලාගෙන සිටින බවට වත්තල පොලිස් සථානයට වෙත ලද පැමිණිල්ලක් මත වත්තල පොලීසිය විසින් විමර්ශන ආරම්භ කර ඇත.
මෙම විමර්ශන සිදුකල නිලධාරීන් විසින් ලැගුම්හලේ නානකාමරය තුළ කාන්තාවක් සිහිසුන්ව සිට සොයාගෙන ඇති අතර මෙම කාන්තාව නැවත සිහි ගැන්වීමට කටයුතු කර අනතුරුව ඇය පරික්ෂා කිරීමේදී අයිස් ග්‍රෑම් 06 මිලිග්‍රෑම් 100ක් සන්තකයේ තිබීම හේතුවෙන් පොලිසිය විසින් අත්අඩංගුවට ගෙන ඇත.
මට්ටක්කුලිය ප්‍රදේශයේ පදිංචිකාරියක වන 35 වන වියේ පසුවන කාන්තාවක් මෙලෙස අත්අඩංගුවට ගෙන ඇත.
මෙම කාන්තාව විදේශ ගතව සිටිමින් මත්ද්‍රව්‍ය බෙදාහරින්නෙකු සමඟ සමීප සම්බන්ධතා පවත්වන බවට සහ එම ජාවාරම්කරු විසින් සුරක්ෂිතව තැබීම සඳහා ටී 56 වර්ගයේ ගිනි අවියක් සහ එම පතොරම් 113ක් ඇය වෙත ලබා දී ඇති බවටද වැඩිදුර විමර්ශන වලදී අනාවරණය කරගෙන ඇත.
ඒ අනුව සැකකාරියගේ මඟපෙන්වීම මත ඇය පදිංචිව සිටින දෙවන විවාහයේ සැමියා පදිංචි රාගම හීන්කෙන්ද නිවසක සඟවා තිබියදී එම ගිනි අවිය සහ පතොරම් සොයාගෙන ඇති අතර එම නිවසේ පදිංචි සැකකාර කාන්තාවගේ 40 වන වියේ පසුවන සැමියාද වත්තල පොලීසිය විසින් අත්අඩංගුවට ගෙන ඇත.
සැකකරුවන් සම්බන්ධයෙන් වැඩිදුර විමර්ශන වත්තල පොලීසිය විසින් සිදුකරනු ලබන බව පොලිස් මාධ්‍ය කොට්ඨාශය ප්‍රකාශ කරන ලදි.
